طريقة عمل قمر الدين

زائر

الكمية تكفي: 8 أشخاص
وقت التحضير: 60 دقيقة
وقت الطهي: 120 دقيقة
المقادير: مشمش سكر
التحضير: لازم نختار الحبه المستويه اللي للونها مشمشي او برتقالي فاقع
نغسل المشمش كويس قوي من بره وبعدين نفتحه نصين ونشيل النوي منه
لازم نبص في كل واحده علشان الدود لان المشمش كل مايكون مستوي كل مايكون عرضه للدود اكتر
الطبخ: نحط المشمش في حله كبيره ونضيف لكل 6 كيلو مشمش كيلو سكر يعني ال 12 كيلو هاياخدوا كيسين سكر
مش هنحط اي اضافات تانيه نهائي لا ميه ولا عصير لمون ولا ملح لمون ولا اي حاجه
نسيبه علي النار وبعد شويه هنلاحظ انه نزل ميه كتير
نسيبه تاني لحد مايتهري خالص
مش اقل من ساعه وبرضه الوقت حسب الكميه اللي هتعمليها
مش هنحتاج نضربه في الخلاط او بالبليندر لانه زي ماقلت مهري خالص ومستوي
هنلاحظ انه بيقل وبيتركز وبيبقي دايب تقريبا
نحط بالكبشه في المصفاه مباشره ونصفي بالكبشه ودي طريقه جميله جدا لتصفيه الطماطم والعصاير
يعني مش باحط ايدي خالص في العصير لا باضغط بالكبشه وباحرك بيها وارجع اضغط لحد مايتصفي كويس
الطريقه دي اسهل واسرع وانضف
هنلاحظ ان القشر اللي طالع قليل قوي بس برضه مش بيترمي
ده يعتبر باكوره انتاج قمر الدين
اول حاجه بناخده علي الخلاط نضربه مع ميه متلجه ونشربه
شكل البيوريه بعد ماتصفي
تقيل وغني وطعمه يجنن ولونه عمره مابيغير لان السكر في حد ذاته ماده حافظه
هنا بقي ممكن نعمل لفات قمر الدين ده لو معندناش مكان في الفريزر لكن لو المكان متوفر يبقي مالهاش اي لزمه وخصوصا ان النتيجه واحده البيوريه زي اللفه مافيش اي فرق في الطعم او الكثافه
نعبي بيوريه قمر الدين في اكياس
دي الاكياس الشفافه بتاعه السندوتشات اعتقد موجوده في كل بيت
كل كيس بنحط فيه خمس كبشات كافيه قوي لعمل شفشق قمر الدين او مهلبيه او تتحط علي الخشاف
كل الكميه ماشاء الله
ال 12 كيلو مشمش بيطلعوا 12 كيس بيوريه مركز
متوسط الحجم
وبالف هنا وشفا

» طريقة عمل لحم كباب حلة
» طريقة عمل حلى طبق بسلة
» طريقة عمل خرشوف